ADORMITO
Adormir en ixas nueis que se´n troban buedas de suenio. Adormir en ixas nueis que, acochato en o leito, tot son sonius de Mario e as suyas barucas, de Andrea e o suyo desbelo, de Manuel que arronca con o suyo peito impliu e dolén.
Ubres os güellos xutos de cafeína. Te tornas e das a güelta e meya. E atra begata més, prexinando que maitín será unatro día. Un día més que ferá semana zenzera, como a leit, carga de bita e mes, carga de añada benién, igual que a zaguera. Quí sape cuan no se i sape cosa.
De nuebas tapas o cuerper d´o ninón que plora. Li das un fortal beso, d´ixos que cuasi dispiertan. Trobas a la nina en o baño, cuasi sonambula. La i lebas a os suyos suenios an surten “Violettas”, mezclolanzas de debers de ayere, un “trol” que la se quiere minchar, dos u tres amigas e un can blango como a nieu que la cudia u li encarraña… O niño gran tampo no aduerme prou bien. Maitín no n´irán á escuela e yo seré més pai que ayere. Luego bendrán os almuerzos, as brendas e a besita á o medico.
Pero as oras continan de raso e solo que foi onra dispierto mientres a nuei se´n ba escampando e as rayadas s´asoman per a finestra entre-ubierta.
Un cafecico e un fumarro en a cozina. Escoscar un poquer as miquetas cosas sin replegar.
A yo me se rematan as añadas entre l´ature e l´asperanza de beyer-los crexer. Talmén perdié a mía chobentú cuan escaba estar mayor. Alto u baxo, me suposo, estió asinas. Allora ers sapen (e bien que lo sapen) que son maitín, presén, esdebenidero que mos leba an no i sape dengún. E yo soy ayere. Ayere feito miquetas . Miquetas de remeranzas e istorias que lis quisiese recontar.
En un inte tot prenzipiará de nuebas. Os colechios. As ropas. Os diens. Fer o leito. Dibuxos en a tele. Ascape, ascape, plegamos tardi. Un día tras d´atro. E mientres o zierzo abraza las cortinas en atro baile perén repetiu.
Víctor Manuel Guíu, el Mestizo
1 comentario
Ángel -